கனடாவின் மார்க்கம் நகரில் ஏற்பட்ட பயங்கர தீ விபத்தில் காயமடைந்து மருத்துவமனையில் அனுமதிக்கப்பட்டிருந்த மூன்று முதியவர்கள், சிகிச்சை பலனின்றி உயிரிழந்துள்ளனர்.
யோர்க் பிராந்திய காவல்துறை இந்த தகவலை வெளியிட்டுள்ளது.
கடந்த ஜூன் 5, வெள்ளிக்கிழமை அதிகாலை 6:45 மணியளவில், கார்ல்டன் சாலை மற்றும் கென்னடி சாலை அருகிலுள்ள ஒரு குடியிருப்பில் தீ விபத்து ஏற்பட்டது.
தகவல் அறிந்தவுடன் அவசரகால மீட்புக் குழுவினர் மற்றும் தீயணைப்பு வீரர்கள் சம்பவ இடத்திற்கு விரைந்தனர்.
தீயணைப்பு வீரர்கள் அங்கு செல்வதற்குள், தீ அருகிலிருந்த மற்றொரு வீட்டிற்கும் வேகமாகப் பரவியதாக தெரிவிக்கப்பட்டுள்ளது. இதனால் பாதுகாப்பு முன்னெச்சரிக்கையாக அப்பகுதியில் இருந்த பல வீடுகளில் வசித்தவர்கள் வெளியேற்றப்பட்டனர்.
சம்பவம் குறித்து தீயணைப்புப் படைத் தலைவர் கிறிஸ் நீரிங் கூறுகையில், “எங்கள் குழுவினர் சம்பவ இடத்திற்குச் சென்றபோது, வீட்டின் முதல் தளத்தில் இருந்து அடர்ந்த புகையும் தீயும் வெளியேறிக் கொண்டிருந்தது. பாதிக்கப்பட்டவர்களில் ஒருவர் குடும்பத்தினரால் மீட்கப்பட்டிருக்கலாம் அல்லது அவர் தானாகவே வெளியேறியிருக்கலாம். மற்ற இருவரை தீயணைப்பு வீரர்கள் வீட்டிற்குள் இருந்து மீட்டு, முதலுதவி குழுவினரிடம் ஒப்படைத்தனர்,” என தெரிவித்தார்.
மருத்துவமனையில் அனுமதிக்கப்பட்டிருந்த மூன்று பேரும் பின்னர் சிகிச்சை பலனின்றி உயிரிழந்ததாக பொலிஸார் தெரிவித்துள்ளனர்.
உயிரிழந்தவர்கள் 70 வயது மதிக்கத்தக்க இரண்டு பெண்கள் மற்றும் 80 வயது மதிக்கத்தக்க ஒரு முதியவர் என அடையாளம் காணப்பட்டுள்ளனர்.
இந்த தீ விபத்துக்கான சரியான காரணம் இதுவரை கண்டறியப்படவில்லை. எனினும், ஆரம்ப கட்ட விசாரணையின் அடிப்படையில், இந்த சம்பவத்தில் சந்தேகத்திற்கிடமான பின்னணி எதுவும் இருப்பதாக தெரியவில்லை என பொலிஸார் கூறியுள்ளனர்.
தீ விபத்துக்கான காரணத்தை கண்டறிய ஒன்டாரியோ தீயணைப்புத் துறைத் தலைவரின் அலுவலகம் விசாரணை நடத்தி வருகிறது. வரும் நாட்களில் இதுகுறித்த மேலதிக தகவல்கள் வெளியாகும் என எதிர்பார்க்கப்படுகிறது.
Comments are closed, but trackbacks and pingbacks are open.