ஹாமில்டனில் போலி பொலிஸ் அதிகாரி கைது – பொதுமக்கள் எச்சரிக்கை

கனடாவின் ஹாமில்டன் நகரில் பொலிஸ் அதிகாரி என போலியாக நடித்து பொதுமக்களை ஏமாற்றி கொள்ளை நடத்திய இளைஞர் ஒருவரை பொலிஸார் கைது செய்துள்ளனர்.

25 வயதுடைய ஆண்ட்ரூ வைட் (Andrew White) என்பவர் தன்னை ரகசிய பொலிஸ் அதிகாரி என அறிமுகப்படுத்தி, மக்களிடம் அடையாள சரிபார்ப்பு பெயரில் அணுகி அவர்களின் உடைமைகளை திருடியதாக குற்றம் சாட்டப்பட்டுள்ளது.

திங்கட்கிழமை காலை சுமார் 8 மணியளவில் Cannon Street East மற்றும் Wellington Street North பகுதியில், ஒருவர் மீது சந்தேகம் இருப்பதாக கூறி, அவரது அடையாளத்தை சரிபார்க்கும் பெயரில் வாலட்டை கைப்பற்றிச் சென்றதாக தெரிவிக்கப்படுகிறது.

அதே நாளில் காலை 9:30 மணியளவில் King மற்றும் Ashley வீதிகள் அருகில், சைக்கிள் திருட்டு விசாரணை எனக் கூறி மற்றொருவரை சோதனை செய்த அவர், அந்த நபரின் மொபைல் தொலைபேசி மற்றும் டெபிட் கார்டையும் அபகரித்துள்ளார்.

இந்த சம்பவங்களைத் தொடர்ந்து மேற்கொள்ளப்பட்ட விசாரணையில் சந்தேகநபரை பொலிஸார் கைது செய்துள்ளனர்.

பொதுமக்களுக்கு எச்சரிக்கை விடுத்துள்ள ஹாமில்டன் பொலிஸார், உண்மையான பொலிஸ் அதிகாரிகள் எப்போதும் தங்களது சீருடை அல்லது அதிகாரப்பூர்வ அடையாள அட்டையுடன் மட்டுமே செயல்படுவார்கள் என்று தெரிவித்துள்ளனர். மேலும், சந்தேகமான சூழலில் பொதுமக்கள் அதிகாரிகளிடம் அடையாள அட்டையை கோருவதற்கு முழு உரிமை உண்டு எனவும் அவர்கள் வலியுறுத்தியுள்ளனர்.

ஆண்ட்ரூ வைட் மீது ஆள்மாறாட்டம், திருட்டு மற்றும் கிரெடிட் கார்டை அனுமதியின்றி பயன்படுத்துதல் உள்ளிட்ட பல குற்றச்சாட்டுகள் பதிவு செய்யப்பட்டுள்ளன.