கனடாவின் வடமேற்கு பிரதேசங்களில் காட்டுத்தீ அணைப்பு பணியில் ஈடுபட்டிருந்த சிறிய ரக விமானம் ஒன்று விபத்துக்குள்ளானதில், அதில் இருந்த மூவர் உயிரிழந்தனர்.
விபத்து, ஜூன் 24 புதன்கிழமை மாலை, Fort Simpson பகுதியில் இருந்து மேற்கே சுமார் 50 கிலோமீட்டர் தொலைவில் இடம்பெற்றதாக Northwest Territories RCMP தெரிவித்துள்ளது. சம்பவ இடத்தை அடைந்த மீட்பு குழுவினர் உயிர் பிழைத்தவர்கள் யாரும் இல்லை என்பதை உறுதிப்படுத்தியுள்ளனர்.
விபத்துக்குள்ளானது காட்டுத்தீ அணைப்பு பணிகளில் பயன்படுத்தப்படும் “Bird Dog” வகை கண்காணிப்பு விமானமாகும். இத்தகைய விமானங்கள், வான்வழி காட்டுத்தீ அணைப்பு நடவடிக்கைகளில் கட்டுப்பாடு மற்றும் ஒருங்கிணைப்பு மையமாக செயல்படுகின்றன. அவை தீ பரவல் நிலையை மதிப்பீடு செய்து, பெரிய நீர்/தீ அணைப்பு விமானங்களுக்கு வழிகாட்டும் பணியையும் மேற்கொள்கின்றன.
NWT Fire தகவலின்படி, இந்த விமானம் Fort Simpson மேற்குப் பகுதியில் உள்ள Martin Hills பகுதியில் பரவி வந்த FS009 காட்டுத்தீயை கட்டுப்படுத்தும் பணியில் ஈடுபட்டிருந்தது. அந்த காட்டுத்தீ இயற்கை காரணத்தால் ஏற்பட்டதாகவும், சுமார் 100 ஹெக்டேர் பரப்பளவில் எரிந்து வந்ததாகவும் தெரிவிக்கப்பட்டுள்ளது.
விபத்துக்குள்ளான விமானம் Buffalo Airways நிறுவனத்துடன் தொடர்புடையதாக உள்ளதாக தகவல்கள் வெளியாகியுள்ளன. அந்த நிறுவனம், உயிரிழந்தவர்களில் தங்களது விமானி ஒருவரும் உள்ளதாக உறுதிப்படுத்தி, குடும்பத்தினருக்கும் காட்டுத்தீ அணைப்பு பணியாளர்களுக்கும் ஆழ்ந்த இரங்கலை தெரிவித்துள்ளது.
இந்த விபத்துக்கான காரணம் இதுவரை உறுதிப்படுத்தப்படவில்லை. கனடாவின் Transportation Safety Board விசாரணையாளர்கள் சம்பவ இடத்துக்கு அனுப்பப்பட்டுள்ளதாக தெரிவிக்கப்பட்டுள்ளது. NWT Coroner Service-மும் விசாரணையில் ஈடுபட்டுள்ளது.
Comments are closed, but trackbacks and pingbacks are open.