கனடிய உள்நாட்டு மதுபானங்களின் விற்பனை முன்னெப்போதும் இல்லாத வகையில் அதீத வளர்ச்சியை எட்டியுள்ளது. அமெரிக்க ஜனாதிபதி டொனால்ட் ட்ரம்ப் கனடா மீது விதித்த வரி விதிப்புகளுக்குப் பதிலடியாக, கனடாவின் பெரும்பாலான மாகாணங்களில் அமெரிக்க மதுபான இறக்குமதிக்குத் தடை விதிக்கப்பட்டுள்ளது.
இதன் விளைவாகவே இவ்வாறு உள்நாட்டு மதுபான விற்பனை அதிகரித்துள்ளது.
குறிப்பாக, ஒண்டாரியோவின் ஓக்வில் (Oakville) பகுதியில் உள்ள ‘மேவெரிக் டிஸ்டிலரி’ (Maverick Distillery) நிறுவனத்தின் வோட்கா விற்பனை 100 சதவீதமும், விஸ்கி விற்பனை 300 சதவீதமும் அதிகரித்துள்ளது.
கடந்த 2025-ஆம் ஆண்டு, அமெரிக்காவின் பொருளாதார நெருக்கடிகளுக்குப் பதிலடி கொடுக்கும் வகையில், ஒண்டாரியோ முதல்வர் டக் ஃபோர்டு உள்ளிட்ட மாகாணத் தலைவர்கள் அமெரிக்க மதுபானங்களை விற்பனை நிலையங்களில் இருந்து அகற்ற உத்தரவிட்டனர்.
உலகிலேயே மதுபானங்களை அதிகளவில் கொள்முதல் செய்பவர்கள் நாங்கள்தான்; எங்களது இந்த நடவடிக்கை அவர்களுக்கு (அமெரிக்காவிற்கு) வலியை ஏற்படுத்தும் என்று டக் ஃபோர்டு அப்போது குறிப்பிட்டிருந்தார். தற்போது ஒண்டாரியோ, கியூபெக், பிரிட்டிஷ் கொலம்பியா உள்ளிட்ட பல மாகாணங்களில் இந்தத் தடை தொடர்ந்து நீடிக்கிறது.
அமெரிக்க போர்பன் (Bourbon) விஸ்கிக்கு மாற்றாக, கனடிய விஸ்கி மற்றும் கென்டக்கி போர்பன் கலந்த புதிய வகை மதுபானங்களை உள்நாட்டு நிறுவனங்கள் அறிமுகப்படுத்தி வருகின்றன.
விற்பனை அதிகரிப்பால் மேவெரிக் போன்ற நிறுவனங்கள் தங்களது உற்பத்தித் திறனை விரிவாக்கம் செய்து வருவதுடன், கூடுதல் பணியாளர்களையும் பணியமர்த்தி வருகின்றன.
வான்கூவர் போன்ற பகுதிகளில் உள்ள சிறு உற்பத்தியாளர்கள், உள்நாட்டில் விளையும் பழங்களைக் கொண்டு ‘ஸ்ட்ராபெர்ரி ஜின்’ போன்ற புதிய ரகங்களை உருவாக்கி “கனடிய தயாரிப்புகளை வாங்குவோம்” (Buy Canadian) என்ற பிரசாரத்தை முன்னெடுத்துள்ளனர்.
