கடந்த ஒரு ஆண்டில், கனடிய விமான சேவை நிறுவனங்கள் அமெரிக்காவுக்கான விமானப் பயணங்களை கணிசமாகக் குறைத்துள்ளன.
அதே நேரத்தில், கரீபியன் தீவுகள் உள்ளிட்ட பிற பிராந்தியங்களுக்கு குறிப்பாக கரீபியன் மற்றும் தென் அமெரிக்காவிற்கு விமான சேவைகளை அதிகரித்துள்ளதாக விமானத் தரவுகளை வழங்கும் ‘சிரியம்’ (Cirium) நிறுவனம் தெரிவித்துள்ளது.
எதிர்வரும் காலத்திலும் கனடா–அமெரிக்க விமானப் பயணங்களில் அதிகரிப்பு ஏற்படும் அறிகுறிகள் இல்லை என கூறப்படுகிறது.
கனடாவின் ஐந்து பெரிய விமான சேவை நிறுவனங்களின் கனடா அமெரிக்க விமானப் பயண எண்ணிக்கை, நான்காம் காலாண்டில் கடந்த ஆண்டுடன் ஒப்பிடுகையில் 14 சதவீதத்திற்கும் அதிகமாக குறைந்துள்ளது.
குறிப்பாக ஃப்ளோரிடா, கலிஃபோர்னியா மற்றும் நெவாடா மாநிலங்களுக்கு கனடிய விமானங்களின் சேவை அளவில் பெரும் வீழ்ச்சி பதிவாகியுள்ளது.
லாஸ் வேகாஸுக்கான விமானப் பயணங்கள் மட்டும் கடந்த ஆண்டைவிட மூன்றில் ஒரு பங்கு அளவிற்கு குறைந்துள்ளன.
இதற்கிடையில், பயணிகள் வேறு நாடுகளை நோக்கி திரும்பியதால், விமான நிறுவனங்கள் கரீபியன் மற்றும் தென் அமெரிக்காவிற்கு விமான சேவைகளை பெரிதும் அதிகரித்துள்ளன.
ஏர் கனடா நிறுவனம் இந்த பகுதிகளுக்கான விமானப் பயண எண்ணிக்கையை 20 சதவீதம் உயர்த்தியுள்ள நிலையில், வெஸ்ட் ஜெட் நிறுவனம் 81 சதவீதம் வரை அதிகரித்துள்ளதாக சிரியம் தெரிவித்துள்ளது.
மேலும், 2024ஆம் ஆண்டுடன் ஒப்பிடுகையில், கனடாவுக்குள் நடைபெறும் உள்நாட்டு விமானப் பயணங்களும், ஐரோப்பா மற்றும் ஆசியாவிற்கான விமான சேவைகளும் அதிகரித்துள்ளன.
விமான நிறுவனங்கள் தங்களின் விமான வலையமைப்புகளை மறுசீரமைக்க வேண்டிய நிலை ஏற்பட்டுள்ளதாக தெரிவிக்கப்படுகிறது.
