கனடாவின் வடமேற்கு பிராந்தியத்தில் காட்டுத்தீ கட்டுப்பாடின்றி பரவி வருவதால், Fort Simpson பகுதியில் வசிக்கும் மக்களை உடனடியாக வெளியேறுமாறு அவசர உத்தரவு பிறப்பிக்கப்பட்டுள்ளது.
வடமேற்கு பிராந்திய அரசின் அதிகாரப்பூர்வ தகவலின்படி, Fort Simpson அருகே பரவி வரும் FS016-26 காட்டுத்தீ காரணமாக, அப்பகுதி மக்கள் பாதுகாப்பிற்காக உடனடியாக வெளியேற வேண்டும் என அறிவுறுத்தப்பட்டுள்ளது. வெளியேறும் மக்கள் முதலில் உள்ளூர் பொழுதுபோக்கு மையத்தில் பதிவு செய்து, அங்கிருந்து மேலதிக வழிகாட்டுதல்களைப் பெற வேண்டும் என தெரிவிக்கப்பட்டுள்ளது.
Fort Simpson கிராமம் சுமார் 1,300 மக்கள் வசிக்கும் தொலைதூர சமூகமாகும். காட்டுத்தீ கிராமத்திற்கு அருகில் பரவி வருவதால், Yellowknife நகரம் முதன்மை தற்காலிக தங்குமிடமாக ஏற்பாடு செய்யப்பட்டுள்ளது. அவசர உதவி மையங்கள் மற்றும் தற்காலிக தங்குமிட வசதிகள் மூலம் வெளியேற்றப்பட்ட மக்களுக்கு தேவையான உதவிகள் வழங்கப்படுகின்றன.
காட்டுத்தீ இதுவரை கிராமத்தின் குடியிருப்பு பகுதிக்குள் நுழையவில்லை என்றும், வீடுகள் அல்லது முக்கிய பொது கட்டடங்கள் பாதிக்கப்பட்டதாக இதுவரை அதிகாரப்பூர்வ தகவல் எதுவும் இல்லை என்றும் தெரிவிக்கப்பட்டுள்ளது. எனினும், தீ பரவல் திசை மற்றும் காற்றின் வேகம் தொடர்ந்து மாறக்கூடியதால், மக்கள் அதிகாரிகளின் அறிவுறுத்தல்களை கண்டிப்பாக பின்பற்றுமாறு கேட்டுக்கொள்ளப்பட்டுள்ளனர்.
தற்போது தீயை கட்டுப்படுத்த Incident Management Team, இரண்டு air tanker குழுக்கள், ஒன்பது ஹெலிகாப்டர்கள், 40 காட்டுத்தீ அணைப்புப் பணியாளர்கள், Wildland Urban Interface Team மற்றும் பல கனரக இயந்திரங்கள் பணியில் ஈடுபடுத்தப்பட்டுள்ளதாக வடமேற்கு பிராந்திய அரசு தெரிவித்துள்ளது.
சாலை வழியாக வெளியேறும் மக்கள் தங்களுக்குத் தேவையான உணவு, தண்ணீர், மருந்துகள், முக்கிய ஆவணங்கள் மற்றும் எரிபொருள் ஆகியவற்றை எடுத்துச் செல்லுமாறு அறிவுறுத்தப்பட்டுள்ளனர். சாலை நிலைமைகள் திடீரென மாறக்கூடியதால், பயணத்திற்கு முன் அதிகாரப்பூர்வ தகவல்களை சரிபார்க்குமாறும் பொதுமக்களுக்கு அறிவுறுத்தப்பட்டுள்ளது.
Comments are closed, but trackbacks and pingbacks are open.