கனடா மற்றும் மெக்சிகோவுடனான முக்கிய வர்த்தக ஒப்பந்தமான CUSMA-வை தற்போதைய வடிவில் 2042 வரை நீட்டிக்க அமெரிக்கா ஒப்புதல் அளிக்க மறுத்துள்ளது.
அமெரிக்க ஜனாதிபதி டொனால்ட் டிரம்ப் நிர்வாகத்தின் இந்த முடிவு, வட அமெரிக்க வர்த்தக உறவுகளில் புதிய அனிச்சையை ஏற்படுத்தியுள்ளது.
அமெரிக்க வர்த்தக பிரதிநிதி ஜேமிசன் கிரீர், புதன்கிழமை நடைபெற்ற மெய்நிகர் சந்திப்புக்குப் பின்னர் இந்த அறிவிப்பை வெளியிட்டார். அந்த சந்திப்பில் கனடா-அமெரிக்க வர்த்தக அமைச்சர் டொமினிக் லெப்லாங்க் மற்றும் மெக்சிகோ பொருளாதார செயலாளர் மார்செலோ எப்ரார்ட் ஆகியோர் கலந்து கொண்டனர்.
CUSMA என கனடாவில் அழைக்கப்படும் இந்த ஒப்பந்தம், அமெரிக்காவில் USMCA என அழைக்கப்படுகிறது. இது முன்னாள் NAFTA ஒப்பந்தத்தை மாற்றி 2020ஆம் ஆண்டு அமலுக்கு வந்தது.
புதன்கிழமை, மூன்று நாடுகளும் இந்த ஒப்பந்தத்தை 2042 வரை நீட்டிக்க விரும்புகிறதா என்பதை அறிவிக்க வேண்டிய முக்கிய காலக்கெடுவாக இருந்தது. கனடா மற்றும் மெக்சிகோ ஏற்கனவே ஒப்பந்தத்தை 16 ஆண்டுகள் நீட்டிக்க விருப்பம் தெரிவித்திருந்தன.
ஆனால், அமெரிக்கா தற்போதைய வடிவில் ஒப்பந்தத்தை புதுப்பிக்க ஒப்புக்கொள்ளவில்லை.
“USMCA ஒப்பந்தத்தை தற்போதைய வடிவில் புதுப்பிக்க அமெரிக்கா சம்மதிக்கவில்லை. ஒப்பந்தத்தின் குறைபாடுகள் மற்றும் கனடா, மெக்சிகோவுடனான அமெரிக்காவின் வர்த்தக பற்றாக்குறைகளை சரிசெய்ய, இரு நாடுகளுடனும் தொடர்ந்து பேச்சுவார்த்தை நடத்துவோம்,” என ஜேமிசன் கிரீர் தெரிவித்துள்ளார்.
இருப்பினும், இந்த முடிவு CUSMA ஒப்பந்தம் உடனடியாக ரத்து செய்யப்படுவதாக அர்த்தமல்ல. தற்போதைய ஒப்பந்தம் 2036 வரை செயல்படும். ஆனால், இனிமேல் ஒப்பந்தம் ஆண்டுதோறும் பரிசீலனைக்கு உட்படுத்தப்படும் வாய்ப்பு உள்ளது.
அமெரிக்காவின் இந்த நிலைப்பாடு பரவலாக எதிர்பார்க்கப்பட்ட ஒன்றாக இருந்தாலும், டிரம்ப் நிர்வாகம் இதை அதிகாரப்பூர்வமாக இப்போது தான் அறிவித்துள்ளது.
டொனால்ட் டிரம்ப் தனது முதல் ஆட்சிக்காலத்தில் இந்த ஒப்பந்தத்தில் கையெழுத்திட்டிருந்தார். அப்போது இதை வரலாற்று முக்கியத்துவம் வாய்ந்த ஒப்பந்தமாக அவர் பாராட்டியிருந்தார். ஆனால் சமீப வாரங்களில், இந்த ஒப்பந்தத்தை அவர் பலமுறை விமர்சித்துள்ளார்.
கனடா தரப்பில், டொமினிக் லெப்லாங்க், மூன்று நாடுகளும் விவாதங்களைத் தொடர்வதன் முக்கியத்துவத்தை ஏற்றுக்கொண்டதாக தெரிவித்துள்ளார்.
“கனடாவுக்கு, அமெரிக்கா விதித்துள்ள கனடிய ஸ்டீல், அலுமினியம், வாகனங்கள் மற்றும் மரப்பொருட்கள் மீதான துறைவாரியான வரிகள் குறித்து அமெரிக்காவுடன் ஆழமான பேச்சுவார்த்தை நடத்துவது இதில் அடங்கும்,” என அவர் குறிப்பிட்டார்.
CUSMA ஒப்பந்தத்தின் கீழ், எந்த நாடும் ஆறு மாத முன் அறிவிப்புடன் ஒப்பந்தத்திலிருந்து விலக முடியும். அதே நேரத்தில், அமெரிக்க ஜனாதிபதி ஒப்பந்தத்திலிருந்து விலகும் உரிமையைத் தக்கவைத்திருக்கிறார் என டிரம்ப் நிர்வாகத்தின் மூத்த அதிகாரி ஒருவர் தெரிவித்துள்ளார்.
இந்த முடிவு, கனடா, அமெரிக்கா மற்றும் மெக்சிகோவுக்கு இடையிலான வாகன உற்பத்தி, எரிசக்தி, மரப்பொருட்கள், ஸ்டீல், அலுமினியம் மற்றும் எல்லை தாண்டிய வர்த்தகத்தில் ஈடுபடும் நிறுவனங்களுக்கு கூடுதல் அனிச்சையை ஏற்படுத்தும் என பொருளாதார நிபுணர்கள் கருதுகின்றனர்.
கனடா மற்றும் மெக்சிகோ ஒப்பந்தத்தை நீட்டிக்க விருப்பம் தெரிவித்திருந்தாலும், அமெரிக்கா திருத்தங்களை வலியுறுத்துவதால், எதிர்வரும் மாதங்களில் கடினமான வர்த்தக பேச்சுவார்த்தைகள் நடைபெறும் என எதிர்பார்க்கப்படுகிறது.
Comments are closed, but trackbacks and pingbacks are open.