ஒன்றாரியோ மாகாண நெடுஞ்சாலையில் அதிவேகமாகச் சென்ற காரை மாகாண பொலிஸார் சோதனையிட்டபோது, பாதுகாப்பு விதிகளை மீறி இரு குழந்தைகள் பயணிக்க வைக்கப்பட்டிருந்த அதிர்ச்சிச் சம்பவம் வெளிச்சத்திற்கு வந்துள்ளது.
இந்தச் சம்பவம் தொடர்பாக, அல்பெர்ட்டா மாகாணத்தைச் சேர்ந்த 33 வயதுடைய சாரதி மீது பல்வேறு போக்குவரத்துக் குற்றச்சாட்டுகள் பதிவு செய்யப்பட்டுள்ளன.
கடந்த ஜூன் 10ஆம் திகதி, நார்த் ஷோர் டவுன்ஷிப்பின் அல்கோமா மில்ஸ் பகுதியில் உள்ள நெடுஞ்சாலை 17இல் ஒன்றாரியோ மாகாண பொலிஸார் போக்குவரத்துக் கண்காணிப்பில் ஈடுபட்டிருந்தனர்.
அப்போது, லோசன் வில்லேஜ் வீதிக்கும் நெடுஞ்சாலை 538க்கும் இடையில் மேற்கு நோக்கி அதிவேகமாகச் சென்ற காரை அவதானித்த பொலிஸார், அதனை வழிமறித்து நிறுத்தினர்.
வாகனத்தைச் சோதனையிட்டபோது, காரில் இருந்த இரண்டு குழந்தைகளும் சட்டப்படி பாதுகாப்பான இருக்கைகளில் அமர வைக்கப்படவில்லை என்பது தெரியவந்தது. அவர்களில் ஒரு குழந்தை காரின் தரையில் அமர வைக்கப்பட்டிருந்ததாகப் பொலிஸார் தெரிவித்துள்ளனர்.
காரில் போதிய இடவசதி இல்லாததாலேயே குழந்தைகள் இவ்வாறு அமர வைக்கப்பட்டிருந்ததாக விசாரணையில் தெரியவந்துள்ளது.
இதையடுத்து, குழந்தைகளின் பாதுகாப்பை உறுதிசெய்ய உடனடி நடவடிக்கை மேற்கொண்ட பொலிஸார், காரில் பயணித்த இரண்டு முதியவர்களை வாகனத்திலிருந்து இறக்கி, அருகிலுள்ள விடுதி ஒன்றிற்கு அனுப்பி வைத்தனர். அதன் பின்னர், இரண்டு குழந்தைகளும் முறையான இருக்கைகளில் அமர வைக்கப்பட்டனர்.
தொடர்ந்து, அந்த வாகனம் பொலிஸ் பாதுகாப்புடன் பிளைண்ட் ரிவர் பகுதிக்கு அழைத்துச் செல்லப்பட்டது. அங்கு குழந்தைகளின் வயது, எடை மற்றும் உயரத்திற்கு ஏற்ற பாதுகாப்பு இருக்கைகள் பொருத்தப்பட்ட பின்னரே, வாகனம் தொடர்ந்து பயணிக்க அனுமதிக்கப்பட்டது.
இந்தச் சம்பவம் தொடர்பாக, அல்பெர்ட்டாவின் ஏர்ட்ரி பகுதியைச் சேர்ந்த 33 வயது சாரதி மீது:
- அதிவேகமாக வாகனத்தைச் செலுத்தியமை
- பயணிகள் இருக்கை வாரை அணியத் தவறியமை தொடர்பான மூன்று குற்றச்சாட்டுகள்
- 16 வயதுக்குட்பட்ட பயணிகள் இருக்கை வார் பொருத்தப்பட்ட இடத்தில் அமராமல் இருந்தபோது வாகனத்தை இயக்கியமை தொடர்பான இரண்டு குற்றச்சாட்டுகள்
ஆகிய குற்றச்சாட்டுகள் பதிவு செய்யப்பட்டுள்ளன.
சாரதி தற்போது விடுவிக்கப்பட்டுள்ள போதிலும், ஒன்றாரியோ போக்குவரத்து நீதிமன்றத்தில் நேரில் முன்னிலையாகுமாறு உத்தரவிடப்பட்டுள்ளது.
வாகனத்தில் பயணிக்கும் ஒவ்வொருவரும் முறையாக இருக்கை வார்களை அணிந்திருப்பதை ஓட்டுநர்கள் உறுதிசெய்ய வேண்டும் எனப் பொலிஸார் நினைவூட்டியுள்ளனர்.
குறிப்பாக, குழந்தைகள் அவர்களின் வயது, எடை மற்றும் உயரத்திற்கு ஏற்ற அங்கீகரிக்கப்பட்ட சிறார் பாதுகாப்பு இருக்கைகளில் அமர வைக்கப்பட வேண்டும் என அறிவுறுத்தப்பட்டுள்ளது.
Comments are closed, but trackbacks and pingbacks are open.