கனடாவின் கியூபெக் மாகாணத்தில், மொன்றியல் அருகே உள்ள Repentigny நகரின் Le Gardeur பகுதியில் சரக்கு ரயில் ஒன்று தடம்புரண்டதால், பாதுகாப்பு முன்னெச்சரிக்கையாக மின்சாரம் துண்டிக்கப்பட்டது.
ஞாயிற்றுக்கிழமை மாலை, Boulevard Le Bourg-Neuf மற்றும் Rue Émile-Genest சந்திப்புப் பகுதியில் CN நிறுவனத்துக்குச் சொந்தமான சரக்கு ரயில் தடம்புரண்டதாக அதிகாரிகள் தெரிவித்துள்ளனர்.
இந்த விபத்தில் சுமார் 45 ரயில் பெட்டிகள் தடம்புரண்டதாக தெரிவிக்கப்படுகிறது. சில டேங்கர் பெட்டிகள் பாதை விட்டு சரிந்ததால், சம்பவப் பகுதி அருகிலுள்ள சாலைகளில் போக்குவரத்து பாதிக்கப்பட்டது. பாதுகாப்பு காரணமாக சில வீடுகளில் வசித்தவர்கள் தற்காலிகமாக வெளியேற்றப்பட்டனர்.
மேலும், மின்சார கட்டமைப்பு பாதிக்கப்பட்டதைத் தொடர்ந்து Hydro-Québec பணியாளர்கள் சம்பவ இடத்திற்குச் சென்று பழுது பார்க்கும் பணிகளில் ஈடுபட்டனர். முன்னெச்சரிக்கை நடவடிக்கையாக அப்பகுதியில் மின்சாரம் துண்டிக்கப்பட்டதால் பல வீடுகள் மின்சாரமின்றி இருந்ததாக தெரிவிக்கப்படுகிறது.
எனினும், ரயில் தடம்புரண்டதில் யாருக்கும் உயிர்ச் சேதமோ காயமோ ஏற்படவில்லை. தீப்பற்றல் அல்லது ரசாயனக் கசிவு எதுவும் இல்லை என்றும், ரயில் பெட்டிகளில் அபாயகரமான பொருட்கள் ஏதும் இல்லை என்றும் CN அதிகாரிகள் உறுதிப்படுத்தியுள்ளனர்.
விபத்துக்கான காரணம் குறித்து விசாரணை நடைபெற்று வருகிறது. தடம்புரண்ட ரயில் பெட்டிகளை அகற்றும் மற்றும் சுத்தப்படுத்தும் பணிகள் காரணமாக அந்தப் பகுதியில் போக்குவரத்து தடைகள் சில நாட்களுக்கு நீடிக்கலாம் என அதிகாரிகள் தெரிவித்துள்ளனர்.
Comments are closed, but trackbacks and pingbacks are open.