கனடாவுக்கு குடிபெயர விரும்புவோர் விரிவான தாமதங்களை எதிர்கொள்ள தயாராக இருக்க வேண்டும் என்று ரொறன்ரோவைச் சேர்ந்த குடியேற்ற வழக்கறிஞர் சாண்டல் டெஸ்லாக்ஸ் கூறியுள்ளார்.
கொவிட்-19இன் கணிக்க முடியாத தன்மை காரணமாக செயலாக்க காலக்கெடு குறித்து வாடிக்கையாளர்களுக்கு அறிவுறுத்துவது கடினம் என்றும் சாண்டல் டெஸ்லாக்ஸ் கூறினார்.
இதுகுறித்து அவர் மேலும் கூறுகையில், ‘கொவிட்-19க்கு முன் நீங்கள் குடியுரிமைக்கு விண்ணப்பித்திருந்தால் ஒரு வருடம் ஆகும். இப்போது இந்த தாமதங்களுடன், நீங்கள் ஒரு வருடத்திற்கும் இரண்டு வருடங்களுக்கும் இடையில் திட்டமிட்டால் அது இன்னும் துல்லியமாக இருக்கும் என்று நான் கூறுவேன்’ என கூறினார்.
அரசாங்கத்தின் குடிவரவு மற்றும் குடியுரிமை வலைத்தளம் இன்னும் நிரந்தர வதிவிட விண்ணப்பங்களை ஏற்றுக்கொண்டிருப்பதாகக் கூறுகிறது. ஆனால் அவற்றை மதிப்பாய்வு செய்து செயலாக்குவதற்கான திறன் கொவிட்-19ஆல் பாதிக்கப்படுகிறது. செயலாக்க நேரங்களை மதிப்பிட முடியாது என்று அரசாங்கம் கூறுகிறது.
நாட்டிற்கு திரும்பும் கனடியர்கள், பாதிக்கப்படக்கூடிய குழுக்கள் மற்றும் அத்தியாவசிய சேவைகளைச் செய்யும் அல்லது ஆதரிக்கும் நபர்களுக்கு இது முன்னுரிமை அளிக்கிறது என்று அரசாங்கம் கூறுகிறது.
