கனடாவில் கேட்கப்படும் (asking) வீட்டு வாடகை ஜனவரி மாதத்தில் வருடாந்திர அடிப்படையில் 2% குறைந்து சராசரியாக 2,057 டொலராக பதிவாகியுள்ளது.
இது தொடர்ந்து 16வது மாதமாக வாடகை விகிதம் குறைந்திருப்பதை காட்டுகிறது. ஜனவரியில் வாடகை கடந்த 31 மாதங்களில் இல்லாத அளவுக்கு குறைந்த நிலையில் இருந்தது.
இரண்டு ஆண்டுகளுக்கு முன்பை விட 6.3% குறைந்திருந்தாலும், COVID-19 தொற்றுநோய்க்கு முன்பிருந்த நிலையை விட இன்னும் 12.9% அதிகமாகவே உள்ளது.
வாடகை குறைவு மற்றும் சந்தை மந்தநிலை காரணமாக வீடு வாடகைக்கு எடுப்போரின் சுமை சற்றே குறைந்துள்ளது.
ஜனவரியில் சராசரி “வாடகை-வருமான விகிதம்” (rent-to-income ratio) ஆறு ஆண்டுகளுக்குப் பிறகு முதன்முறையாக 30% க்குக் கீழே சரிந்துள்ளது. வாடகையாளர்களுக்கு வசிப்புத்தகுதி கணிசமாக மேம்பட்டுள்ளது.
அதிக வழங்கல் (supply) விலைகளை குறைக்கிறது என்பதற்கான சான்று இது என Urbanation நிறுவனத் தலைவர் ஷான் ஹில்டெபிராண்ட் தெரிவித்துள்ளார்.
கடந்த இரண்டு ஆண்டுகளில் வாடகை வீடுகளின் சராசரி பரப்பளவு குறைந்ததும் வாடகை வீழ்ச்சிக்கு காரணமாக இருந்துள்ளது.
ஜனவரியில் வாடகை பட்டியலிடப்பட்ட வீடுகளின் சராசரி பரப்பளவு 857 சதுர அடியாக இருந்தது.
இது கடந்த ஆண்டு 885 சதுர அடியாக இருந்ததை விட குறைவாகும். வாடகை தொடர்ந்து குறைந்தாலும், தொற்றுநோய்க்கு முன்பிருந்த நிலையை விட விலைகள் இன்னும் உயர்ந்தே உள்ளன.
இருப்பினும், அதிக வீட்டு வழங்கல் மற்றும் சந்தை சீராக்கம் காரணமாக 2026ஆம் ஆண்டில் வாடகையாளர்களுக்கு சற்று நிம்மதி கிடைக்கும் என நிபுணர்கள் மதிப்பிடுகின்றனர்.
