கனடா வங்கி (Bank of Canada) 2025-ஆம் ஆண்டின் இறுதி நிதிக் கொள்கை முடிவில் வட்டி விகிதத்தை மாற்றாமல், 2.25% ஆகத் தக்க வைத்துள்ளது.
“தற்போதைய கொள்கை வட்டி விகிதம் பணவீக்கத்தை 2% அருகில் வைத்திருக்கவும், பொருளாதாரம் ‘கட்டமைப்பு மாற்றம்’ (structural adjustment) எனும் காலகட்டத்தைக் கடக்க உதவவும் சரியான அளவில் உள்ளது” என வங்கியின் ஆளுநர் டிஃப் மேக்லெம் தெரிவித்துள்ளார்.
நடுநிலை வட்டி வீச்சின் (neutral range) கீழ் முனையில் கொள்கை விகிதத்தை வைத்திருப்பது பொருளாதாரத்துக்கு லேசான ஆதரவை அளிக்கும்; அதே நேரத்தில் பணவீக்க அழுத்தங்களைக் கட்டுப்படுத்தும்” என்று அவர் தெரிவித்தார்.
மொத்த உள்நாட்டு உற்பத்தி
தனியார் துறை பொருளாதார வல்லுநர்கள் இம்முடிவை முன்கூட்டியே எதிர்பார்த்திருந்தனர்.
2026-ஆம் ஆண்டின் முதல் சில மாதங்களுக்கும் விகிதம் மாறாது என அவர்கள் கருதுகின்றனர்.
கனடா வங்கியின் அக்டோபர் நிதிக் கொள்கை அறிக்கையின்படி, அமெரிக்காவின் புதிய கட்டணங்கள் மற்றும் வர்த்தக மோதல்கள் காரணமாக 2026 இறுதிக்குள் கனடாவின் மொத்த உள்நாட்டு உற்பத்தி (GDP) சுமார் 1.5% அல்லது 40 பில்லியன் டாலர் அளவுக்கு குறைவாக இருக்கும் என மதிப்பிடப்பட்டுள்ளது.
2026 மற்றும் 2027-ல் சராசரி GDP வளர்ச்சி 1.4% ஆக இருக்கும் என வங்கி தெரிவித்துள்ளது.
“புதிய அதிர்ச்சிகள் அல்லது தரவுகள் எதிர்பார்த்ததை விட வேறுபட்டால், நாங்கள் உடனடியாக பதிலளிப்போம்” என மேக்லெம் உறுதியளித்தார்.
அமெரிக்க கட்டணங்கள் இருந்த போதிலும், நுகர்வோர் செலவினம், வணிக முதலீடு, உற்பத்தித்திறன் வளர்ச்சி ஆகியவை எதிர்பார்த்ததை விட சிறப்பாக உள்ளதாக ஆளுநர் சுட்டிக்காட்டினார்.
