ஒன்டாரியோ மாகாணத்தைச் சேர்ந்த ஒரு நிறுவனத்தின் சில சோப் தயாரிப்புகளுக்கு கனடா முழுவதும் மீட்பு (Recall) அறிவிப்பை ஹெல்த் கனடா வெளியிட்டுள்ளது.
மெதில் யூஜெனோல் (Methyl Eugenol) என்ற ரசாயனப் பொருள் அனுமதிக்கப்பட்ட அளவை விட அதிகமாக இருப்பது கண்டறியப்பட்டதைத் தொடர்ந்து, இந்த நடவடிக்கை எடுக்கப்பட்டுள்ளதாக ஹெல்த் கனடா தெரிவித்துள்ளது.
மீட்பு அறிவிப்பின் படி, Lake of the Woods Sunrise Soap Company தயாரித்த “Shades of Grey” என்ற பெயருடைய சோப்புகள் சுமார் 400 அலகுகள், 2019 ஜனவரி முதல் 2026 ஜனவரி வரை கனடாவில் விற்பனை செய்யப்பட்டுள்ளன. இச்சோப்புகள் ஒன்டாரியோ மாகாணத்தின் கெனோரா (Kenora) நகரில் தயாரிக்கப்பட்டவை என்றும், 16 கிராம், 67 கிராம் மற்றும் 135 கிராம் எடையுள்ள கட்டிகளாக சந்தைப்படுத்தப்பட்டதாகவும் குறிப்பிடப்பட்டுள்ளது.
ஹெல்த் கனடா விளக்கத்தில், “மெதில் யூஜெனோல் புற்றுநோய் ஏற்படுத்தும் அபாயம் கொண்டதாகக் கருதப்படுவதால், தூய ரசாயனமாக பயன்படுத்த தடை செய்யப்பட்டுள்ளது. ஆனால், சில தாவரச் சாற்றுகளில் இயற்கையாக காணப்படும் அளவிற்கு மட்டும், குறிப்பிட்ட வரம்புகளுக்குள் பயன்படுத்த அனுமதி வழங்கப்பட்டுள்ளது” எனத் தெரிவிக்கப்பட்டுள்ளது.
இதுவரை, 2026 ஜனவரி 7 வரை, இந்த தயாரிப்புகள் காரணமாக எந்தவிதமான விபத்து அல்லது காயம் தொடர்பான புகார்களும் பதிவாகவில்லை என்றும் அறிவிப்பில் கூறப்பட்டுள்ளது.
மீட்கப்பட்டுள்ள சோப்புகளை உடனடியாகப் பயன்படுத்துவதை நிறுத்தி, அவற்றை பாதுகாப்பான முறையில் அகற்றுவதோடு, மாற்றுப் பொருள் அல்லது மேலதிக தகவல்களுக்காக சம்பந்தப்பட்ட நிறுவனத்தை தொடர்பு கொள்ளுமாறு நுகர்வோருக்கு ஹெல்த் கனடா அறிவுறுத்தியுள்ளது.
