கனடாவில் இருந்து மீளப் பெறப்படும் வாகனங்கள்!

கனடாவில் உற்பத்தி குறைபாடு காரணமாக கிட்டத்தட்ட 17,000 வாகனங்களை டொயோட்டா நிறுவனம் திரும்பப் பெறுவதாக அறிவித்துள்ளது.

குறிப்பிட்ட சில வாகனங்களின் என்ஜின்கள் சரியாக தயாரிக்கப்படாததால், அவற்றிற்குள் இருக்கும் உலோகத் துகள்கள் கிரான்ஷாஃப்ட் பேரிங்குகளை சேதப்படுத்தக்கூடும் என கனடா போக்குவரத்துச் சபை தெரிவித்துள்ளது.

இதன் காரணமாக வாகனம் ஓடிக்கொண்டிருக்கும்போதே திடீரென என்ஜின் நின்றுவிடலாம் எனவும், இதனால் விபத்து ஏற்படும் அபாயம் உள்ளதாகவும் எச்சரிக்கப்பட்டுள்ளது.

லெக்ஸஸ் (Lexus): GX 550 மாடல் (2024 இல் தயாரிக்கப்பட்டது), லெக்ஸஸ் (Lexus): LX 600 மாடல் (2023 மற்றும் 2024 இல் தயாரிக்கப்பட்டது), டொயோட்டா டன்ட்ரா (Toyota Tundra): 2023 மற்றும் 2024 இல் தயாரிக்கப்பட்ட மாடல்கள் பாதிப்புக்கு உள்ளாகியுள்ளன.

கடந்த நவம்பர் மாதம் சுமார் 14,000 வாகனங்களை திரும்பப் பெறுவதாக அறிவிக்கப்பட்ட பழைய உத்தரவிற்கு மாற்றாகவே இந்த புதிய அறிவிப்பு வெளியிடப்பட்டுள்ளது.

பாதிக்கப்பட்ட வாகனங்களின் உரிமையாளர்களுக்கு டொயோட்டா நிறுவனம் தபால் மூலம் இந்த விவரங்களை முறைப்படி தெரிவிக்கும். மேலும், இந்த என்ஜின் குறைபாட்டை சரிசெய்வதற்கான வழிமுறைகளை நிறுவனம் இன்னும் உருவாக்கி வருவதாக கனடிய போக்குவரத்து திணைக்களம் குறிப்பிட்டுள்ளது.