உலக நாடுகளுடன் ஒப்பிடுகையில் கனடாவின் வெளிப்புறக் காற்றின் தரம் மிகவும் நல்ல நிலையில் இருப்பதாகக் கருதப்பட்டாலும், கனடா நகரங்களில் உள்ள காற்று மாசுபாடு அங்கு வாழும் பெரியவர்களின் மூளை ஆரோக்கியத்தைக் குறைப்பதாக மெக்மாஸ்டர் பல்கலைக்கழகத்தின் புதிய ஆய்வு ஒன்று தெரிவிக்கிறது.
இந்த மாத தொடக்கத்தில் ‘ஸ்ட்ரோக்’ என்ற மருத்துவ இதழில் ஆன்லைனில் வெளியிடப்பட்ட இந்த ஆய்வு, கனடாவின் முக்கிய நகரங்களில் உள்ள குறைந்த அளவிலான காற்று மாசுபாட்டிற்கும், மக்களின் ஆரம்பக்கட்ட அறிவாற்றல் குறைபாட்டிற்கும் இடையே உள்ள தொடர்பை வெளிப்படுத்தியுள்ளது.
அதிக காற்று மாசுபாடு உள்ள பகுதிகளில் வசிக்கும் மக்கள், நினைவாற்றல், புரிந்துகொள்ளுதல் மற்றும் மூளையின் வேகம் தொடர்பான சோதனைகளில் குறைவான திறனை வெளிப்படுத்தியுள்ளனர் என்று இந்த ஆய்வு கண்டறிந்துள்ளது.
கனடாவின் மிகக் குறைந்த காற்று மாசு சூழலிலும் இந்த பாதிப்பு ஏற்படுகிறதா என்பதை ஆராய தாங்கள் விரும்புவதாக இந்த ஆய்வின் முதன்மை ஆய்வாளரான சாண்டி ஆசாப் தெரிவித்துள்ளார்.
இதற்காக, கனடாவின் ஹாமில்டன், டொராண்டோ, கால்கரி, வான்கூவர், ஒட்டாவா, மாண்ட்ரியல் மற்றும் ஹாலிஃபாக்ஸ் உள்ளிட்ட முக்கிய நகரங்களைச் சேர்ந்த 32 முதல் 81 வயதுக்குட்பட்ட (சராசரி வயது 57.6) சுமார் 7,000 பெரியவர்களின் தரவுகள் பகுப்பாய்வு செய்யப்பட்டன.
பங்கேற்பாளர்கள் வசித்த பகுதிகளில் கடந்த 5 ஆண்டுகளாக இருந்த காற்று மாசுபாட்டின் அளவு கண்காணிக்கப்பட்டது. பின்னர் நான்கு ஆண்டுகளுக்கும் மேலாக அவர்களின் மூளைச் செயல்பாடு தொடர்ந்து சோதிக்கப்பட்டது.
மேலும், எம்.ஆர்.ஐ (MRI) ஸ்கேன் மூலம் மூளையில் ஏற்பட்ட முன்கூட்டியே கண்டறிய முடியாத நுட்பமான மாற்றங்களும் ஆராயப்பட்டன.
காற்றில் உள்ள நுண் துகள்கள் எனப்படும் PM2.5 மற்றும் நைட்ரஜன் டை ஆக்சைடு ஆகிய இரண்டு முக்கிய மாசுபடுத்திகளே மூளையின் செயல்பாட்டைக் குறைக்கின்றன என்று ஆராய்ச்சியாளர்கள் கண்டறிந்துள்ளனர்.
இவற்றின் தாக்கம் அதிகமாக இருக்கும்போது, நினைவாற்றல் மற்றும் மூளையின் செயலாக்க வேகம் ஆகியவை கணிசமாகக் குறைவது தெரியவந்துள்ளது.
இதயம் சார்ந்த நோய் அபாயம் உள்ளவர்கள், தாங்கள் வசிக்கும் பகுதியின் காற்று மாசு குறித்து மருத்துவர்களிடம் ஆலோசனை பெற வேண்டும். தற்போதைய மருத்துவ முறையில் நோயாளிகளிடம் அவர்களின் காற்று மாசு பாதிப்பு குறித்து யாரும் கேட்பதில்லை என்று அவர் சுட்டிக்காட்டியுள்ளார்.
Comments are closed, but trackbacks and pingbacks are open.